رباعيات

                           كلمات / أحمد عبد اللطيف النجار

                              ليه ....؟!!

الوشوش كالحة والحيرة فيها عدم

ليه طبعنا إحنا البشر الاعتذار من غير ندم ؟!

وليه نزاحم بعضنا بالذراع وبالقدم ؟!

وليه نجازي اللي بنا ونكّرم اللي هدم ؟!!

                                  نصيحة

حاسب يا ابن آدم دا أصلك من تراب

قرّب من العمار  وابعد عن الخراب

تفكيرك يبقي واضح مش وهم أو سراب

خلي حلمك بسيط لأجل يكون مُجاب !

                          خليها علي الله

الدودة جوه الحجر دي رزقها مضمون

يرزقها ربي وربك رب كل الكون

وإن ضاقت بيك يا صاحبي اطلب من الله العون

تلقي الطريق مفتوح وكل صعب يهون !

                         

                             رباعيات

                          جدد حياتك

غيّر وجدد حياتك بس بنظام وحساب

خلي بابك موارب للأهل والأحباب

الدنيا من غير بشر الوحدة فيها عذاب

وساعات كمان بالبشر تغلب شريعة الغاب !

                           أيام زمان

كان نفسي والله أكون عايش أيام زمان

أيامها كان الوِد والحب والحنان

الأخ يحب أخوه ولا يرضي له الهوان

وحتى شوق الناس علي الوش كان يبان !

           

                          الطيّب أحسن

اعمل طيّب وارميه اليّم

ولا عايزك أبداً تتغم

دا المعروف عمره ما يتزم

وإيه في الدنيا يساوي الهم ؟!

                              لسانك حصانك

أوعاك تقول لما يتوجب السُكات

أو حتى تندم على اللي راح واللي فات

بإيه يفيد بس الندم غير اجترار الذكريات

فكّر في بكرة واللي جاي واللي آت !

                            رباعيات

                    فلسفة الموت  1

الموت كاس كلنا شاربينه المتعافي والعيان

قدر مكتوب ومسّطره المولي الديان

بالحزن ليه نصوره ونعيشه في أحزان

أصل الحياة جسر واهي والله دي مهرجان

                           فلسفة الموت 2

ها تخش قبرك وحيد لا أهل ولا خلان

الكل داخله يا صاحبي شجاع كان أو جبان

ولا فيه ملك أو وزير ، الكل فيه سيان

ولا فيه غني أو فقير وكل  شئ بالميزان !

                       فلسفة الموت 3

الموت دا أمر طبيعي كما الميلاد بأوان

وشئ لابد منه علي بني الإنسان

دا العمر مهما يطول مالوش يا صاحبي أمان !

عيش حياتك بطولها أوعاك تكون غفلان !

        

                        فلسفة الموت 4

  الحكم في الآخرة عادل مش فيه كنا وكان

في السؤال مش ها تنطق وتتكلم الأبدان

مش تحاول تراوغ كلع عليك ها يبان

إن كنت صادق تفوز ولو عصيت خسران !

                  رباعيات

                    فلسفة الموت 5

المؤمن  الواعي فعلاً اللي وعي القرآن

حافظ عليه جوه قلبه عمره ما كان سهيان

عارف إنه بعمله ممكن يكون خسران

والرك علي نيته واللي في ضميره كان !

                          ابتسم من فضلك

ابتسم للدنيا واضحك من فؤادك

يبقي حب الخلق غايتك يبقي زادك

بابتسامة حلوة صافية تنول مرادك

وليه تكشّر للزمن ويطول عنادك ؟!

                            الذكري المؤلمة

ليه الخيانة بتجري في دمكم ؟

ليه المشاعر متحجرة ، ليه عِندكم ؟

أنا جرح قلبي اكتوى بنار جرحكم

بس الأكادة كان دواه في بُعدكم

وفي  احتمال  الآهات من بعدكم

وتبقي أحضان الحبايب فيها العوض عن حضنكم

يبقي أمل بكرة اللي جاي ارحم كتير من بُغضكم

وربنا شاهد علي قساوة قلبكم !!

                           بكرة أحلى

خلي نارك تبقي باردة

دا العتاب أسبابه واردة

لأجل قلبك يبقي صافي

والهموم تلقاها شاردة

لأجل بكرة يبقي أحلي

لأجل تبقي الدنيا وردة

والأمل يفرد جناحه

يبقي طوله ألف ياردة

بكرة أحلي وبحلاوته

نتحمل مُر النهاردة !

                            زلة لسان

مش كل من قال كلام يبقي يعني كتب

ولا كل زلة لسان يبقي عليها العتب

ولا كل كبوة حصان لابد فيها العطب

يا سلام يا دنيا الأمل لو يأسي فيكي اتشطب

وابل ريقي بحلاوتك ما يكونش ناشف حطب

يا سلام يا أهلي يا ناسي لو تترقي النفوس

ونحب بعض حقيقي ما يكون غرضنا الفلوس

وكلامنا يبقي بحساب مش علي بعض ندوس !!

                             ولا يهمك

اصلب طولك .. اصلب طولك

أوعا اليأس يا أخويا يطولك

اثبت، حدد أهداف قولك

خليك جامد ، شادد حيلك

مهما يكون السعد بعيد

طولة البال ها تنول هولك

اصلب طولك .. اصلب طولك

                       ///////////////////////// 

                         ليه الغرور ؟!

لما تكون عايز تحب                            والقلوب الطيبة تقدر تحبك

لما تكون النية صافية                          وفي عمايلك ترضي ربك

اعتمد علي الموالي وحده                     ولا عمر عقلك يوم يغرك

ولا تفتكر انك خلاص                            امتلكت حاجات تسُرك

حاول تفكر مرة صح                             ممكن عنادك يوم يضُرك!

                          //////////////////////////////////////

                                              أحمد النجار